CV90 PDM-ləri “Iron Fist” APS-lərlə mühafizə olunacaq

İsrailin “Elbit Systems” və İsveçin “BAE Systems Hägglunds” şirkətləri arasında “Iron Fist” (“Dəmir Yumruq”) aktiv mühafizə sistemlərinin (active protection systems – APS) tədarükü üçün 130 milyon ABŞ dolları dəyərində müqavilə imzalanıb.

Bu barədə “Poliqon” “Elbit Systems” şirkətinə istinadən xəbər verib.

Bildirilib ki, “Elbit Systems”in tədarük edəcəyi “Iron Fist” aktiv mühafizə sistemləri “BAE Systems Hägglunds” tərəfindən adı açıqlanmayan Avropa ölkəsi üçün istehsal olunan CV90 piyada döyüş maşınlarına quraşdırılacaq.

Müqavilənin şərtlərinə görə, “Elbit Systems” aktiv mühafizə sistemlərinin istehsalı və çatdırılması ilə bağlı bütün işləri qarşıdakı beş il yarım müddətində həyata keçirəcək.

“Iron Fist” APS müasir dövrün döyüş meydanında xarici təhlükələrə qarşı zirehli platformaların özünümüdafiə imkanlarını artırmaq üçün inkişaf etdirilmiş aktiv mühafizə sistemidir. İsrail Müdafiə Qüvvələri tərəfindən istifadə edilən və ikinci nəsil aktiv mühafizə sistemi olan “Iron Fist” yüksək performans, aşağı həcm, kütlə və güc tələbləri ilə xarakterizə olunur.

O, zirehli platformaları həm açıq ərazidə, həm də şəhər mühitində tank əleyhinə raketlar, pilotsuz uçuş aparatları (PUA) və süzən sursatlar kimi müxtəlif növ təhdidlərdən 360 dərəcə müdafiə ilə təmin edir.

Əlavə məlumat üçün qeyd edək ki, “BAE Systems Hägglunds”, Böyük Britaniyanın “BAE Systems” şirkətinin İsveçdə fəaliyyət göstərən törəməsi və CV90 PDM-lərinin əsas istehsalçısıdır.