İsrail Müdafiə Qüvvələri üçün iki yeni döyüş təyyarəsi eskadrilyasının alınması təsdiqlənib.
Bu barədə “Poliqon” İsrail Müdafiə Nazirliyinə istinadən xəbər verib.
Bildirilib ki, müvafiq qərar İsrail Müdafiə Nazirliyinin təşəbbüsü ilə Nazirliklərarası Satınalma Komitəsi tərəfindən qəbul olunub.
Plana əsasən, İsrail ABŞ-ın “Lockheed Martin” şirkətindən dördüncü F-35 “Lightning II” eskadrilyasını, “Boeing” şirkətindən isə ikinci F-15IA eskadrilyasını əldə edəcək. 10 milyardlarla İsrail şekeli dəyərində olan müqavilələr çərçivəsində təyyarələrin İsrail Hərbi Hava Qüvvələrinə inteqrasiyası, texniki xidmət, ehtiyat hissələri və logistika dəstəyi də təmin ediləcək.
Bu qərar İsrailin Baş naziri və müdafiə naziri tərəfindən təsdiqlənmiş, 350 milyard şekel büdcəyə malik Müdafiə Qüvvələrinin 10 illik qüvvə quruculuğu planının icrasında ilk addımdır.
Müdafiə naziri İsrael Katz və Nazirliyin baş direktoru Amir Baram tərəfindən təqdim edilən təşəbbüsün yaxın onillikdə İsrailin hava üstünlüyünün qorunmasında mühüm rol oynayacağı bildirilir.
Komitənin qərarından sonra İsrail Müdafiə Nazirliyinin ABŞ-dakı nümayəndəliyinə müqavilələrin yekunlaşdırılması üçün Amerika tərəfi ilə danışıqların davam etdirilməsi tapşırılıb.
