STM şirkəti dəniz müharibəsində oyunun qaydalarını dəyişdirməyə hazırlaşan yeni nəsil kamikadze insansız dəniz aparatı (İDA) YAKTU-nu SAHA 2026 sərgisində ilk dəfə təqdim edib.
“Poliqon” xəbər verir ki, yüksək sürəti, aşağı silueti, sürü əməliyyat qabiliyyəti və yüksək zərbə gücü ilə diqqət çəkən platforma liman müdafiəsindən açıq dəniz əməliyyatlarınadək asimmetrik müharibə mühitinin bütün kritik ehtiyaclarına cavab vermək üçün milli imkanlarla hazırlanıb.
Strateji suüstü hədəflərə qarşı dəqiq zərbə missiyaları üçün optimallaşdırılan YAKTU İDA 5,8 metr uzunluğu və kompakt dizaynı sayəsində aşkarlanması çətin olan quruluşa malikdir. 50 knotdan artıq maksimal sürəti ilə hərəkətdə olan dəniz vasitələrinə qarşı sürətli hücum təmin edən kamikadze İDA, 200 dəniz milindən çox mənzili sayəsində geniş əməliyyat radiusuna sahibdir.
YAKTU-nun ən diqqətçəkən xüsusiyyəti olan sürü zəkası İDA-ların bir-biri ilə ani məlumat paylaşımı apararaq avtonom şəkildə tapşırıq bölgüsü həyata keçirməsinə imkan verir. Yerli avadanlıq və milli proqram təminatı arxitekturası ilə hazırlanan YAKTU, birbaşa görüş xətti və peyk rabitəsi (SATCOM) seçimləri sayəsində şəbəkə dəstəkli əməliyyat qabiliyyətini bütün əməliyyat mühitlərində yüksək səviyyədə saxlayır.
İstehsalçının bildirdiyinə görə, adını qədim türkcədə “işıq” və “aydınlıq” mənasını verən sözdən alan və kök etibarilə “yandırmaq” felindən törəyən YAKTU, dəniz üzərindəki yüksək sürəti və gecə-gündüz fərq etmədən hədəfinə yönələn qətiyyətli xüsusiyyəti ilə Türkiyədə “Mavi Vətən”in yeni işığı olmağa hazırlaşır.
