![SHXÇDX rəisi Sabirabadda vətəndaşları qəbul edib SHXÇDX rəisi Sabirabadda vətəndaşları qəbul edib](https://poliqon.az/wp-content/uploads/2023/02/91ca3c48dba41b773b20f3611d18592c.jpg)
SHXÇDX rəisi Sabirabadda vətəndaşları qəbul edib
Azərbaycan Prezidenti İlham Əliyevin tapşırığına və mərkəzi icra hakimiyyəti orqanlarının, digər qurumların rəhbərlərinin 2023-cü ilin fevral ayında şəhər və rayonlarda vətəndaşların qəbulu cədvəlinə uyğun olaraq Səfərbərlik və Hərbi Xidmətə Çağırış üzrə Dövlət Xidmətinin (SHXÇDX)rəisi, general-polkovnik Arzu Rəhimov fevralın 16-da Sabirabadda Saatlı, İmişli, Beyləqan, Xocavənd və Sabirabad rayonlarından olan vətəndaşların qəbulunu həyata keçirib.
SHXÇDX-nin mətbuat mərkəzindən “Poliqon”a verilən məlumata görə, Xidmət rəisi, general-polkovnik Arzu Rəhimovun keçirdiyi qəbulda 21 vətəndaşın müraciəti dinlənilib.
Müraciətlər əsasən həqiqi hərbi xidmətə və ya işə qəbul, veteran adı və vəsiqəsinin verilməsi, övladının xidmət yerinin müəyyənləşdirilməsi, qismən səfərbərliklə əlaqədar təşkilatların və vətəndaşların mülkiyyətində olan nəqliyyat vasitələrinə vurulmuş zərərin ödənilməsinə köməkliyin göstərilməsi, eləcə də digər məsələlər ilə bağlı olub.
Qəbul zamanı vətəndaşların müraciətlərinin həlli ilə bağlı mövcud qanunvericiliyin tələbləri izah edilib, araşdırılmasına ehtiyac olan məsələlər qanunvericiliyə uyğun olaraq tədbirlər görülməsi üçün nəzarətə götürülüb. Bəzi vətəndaşlar tərəfindən qaldırılan və Xidmətin səlahiyyətlərinə aid olmayan müraciətlər isə aidiyyəti orqanlara çatdırılması üçün qeydiyyata alınıb.
Bölgə sakinlərinin yerlərdə qəbulu və müraciətlərinə baxılması üçün daha rahat və əlverişli şərait yaradılmasından razılıqlarını ifadə edən vətəndaşlar göstərilən diqqət və qayğıya görə dövlətimizin başçısına minnətdarlıqlarını bildiriblər.