Çinin 5-ci nəsil J-35 qırıcı təyyarəsi sosial şəbəkələrdə yayılan fotogörüntülərdə qeyri-adi dərəcədə parlaq və gümüşü səthi ilə diqqət çəkib.
“Poliqon” “Army Recognition”a istinadən xəbər verir ki, J-35 təyyarəsinin hamar və yüksək əks etdirici səthi ənənəvi “stealth” (aşağı görünürlüklü) qırıcılarında istifadə olunan tutqun boz örtüklərdən fərqlənir.
Bu görüntü ABŞ-ın daha əvvəl F-22A “Raptor” və F-35C “Lightning II” təyyarələrində bənzər örtüklərlə keçirdiyi sınaqları da gündəmə gətirib.
Mütəxəssislər bildirirlər ki, yalnız fotolara əsaslanaraq J-35-də yeni radaruducu material və ya “stealth” örtüyünün tətbiq edildiyini təsdiqləmək mümkün deyil. Səthin görünüşünə günəş bucağı, çəkiliş şəraiti və görüntünün emalı da təsir göstərə bilər. Eyni zamanda, bunun eksperimental örtük, qoruyucu plyonka və ya yeni üst qat olması ehtimalı da nəzərdən keçirilir.
J-35-in təyyarə gəmiləri (aviadaşıyıcı) üçün nəzərdə tutulması isə məsələyə əlavə əhəmiyyət verir. Yeni materialın radar və infraqırmızı imzanı idarə etməklə yanaşı, duzlu dəniz mühiti, rütubət və intensiv texniki xidmət şəraitinə davamlı olması da vacibdir.
Hazırda J-35-dəki gümüşü səthin məqsədi Çin tərəfindən açıqlanmayıb. Təyyarənin bu görünüşlə gələcək uçuşlarda və aviadaşıyıcı sınaqlarında təkrar müşahidə olunması texnologiyanın xarakteri barədə daha çox məlumat verə bilər.
