“Elbit Systems” adı açıqlanmayan müştəriyə PULS YARS-lar üçün raketlər tədarük edəcək

İsrailin “Elbit Systems” şirkəti adı açıqlanmayan Avropa ölkəsinə PULS yaylım atəşli reaktiv sistemlər (YARS) üçün raketlər tədarük edəcək.

“Poliqon” “Elbit Systems”ə istinadən xəbər verir ki, bununla bağlı tərəflər arasında 130 milyon ABŞ dolları dəyərində müqavilə imzalanıb.

Üç il müddətində həyata keçiriləcək müqaviləyə əsasən, “Elbit Systems” şirkəti müştəriyə təlim raketləri, ACCULAR, EXTRA və “Predator Hawk” daxil olmaqla bir sıra qabaqcıl raketlər tədarük edəcək.

Qeyd edilib ki, bu sistemlər müştərinin müdafiə qüvvələrinin əməliyyat imkanlarını əhəmiyyətli dərəcədə artırmaq, onlara strateji və taktiki əməliyyatlarda əhəmiyyətli dəstək vermək üçün nəzərdə tutulub.

Perspektivli PULS YARS “Elbit Systems”in müxtəlif, o cümlədən yüksək dəqiqlikli, idarə olunan reaktiv sursatlardan istifadə etmək imkanı olan 2 konteyneri yerləşdirən çoxməqsədli dəqiq universal buraxma sisteminin (Precise Universal Launching System) əsasında hazırlanıb.

PULS YARS buraxma qurğusuna aşağıda sadalan reaktiv mərmilər olan 2 konteyner yerləşdirilə bilər:

• 122 mm çaplı və 35 km-ə qədər uçuş mənzilli “AccuLAR-122” – 18 ədəd;
• 160 mm çaplı və 40 km-ə qədər uçuş mənzilli “AccuLAR-160” – 10 ədəd;
• 306 mm çaplı və 150 km-ə qədər uçuş mənzilli “Extra” – 4 ədəd;
• 370 mm çaplı və 300 km-ə qədər uçuş mənzilli “Predator Hawk” – 2 ədəd.