Azərbaycan Ordusunda müddətli həqiqi hərbi xidmətə qəbul və ehtiyata buraxılma tədbirləri keçirilir

Azərbaycan Ordusunda müddətli həqiqi hərbi xidmətə qəbul və ehtiyata buraxılma tədbirləri keçirilir

Azərbaycan Prezidentinin “Azərbaycan Respublikası vətəndaşlarının 2023-ci il yanvarın 1-dən 30-dək müddətli həqiqi hərbi xidmətə çağırılması və müddətli həqiqi hərbi xidmət hərbi qulluqçularının ehtiyata buraxılması haqqında” müvafiq sərəncamının icrası ilə bağlı Orduda həyata keçirilən tədbirlər davam edir.

Müdafiə Nazirliyinin mətbuat xidmətindən “Poliqon”a verilən məlumata görə, “Hərbi vəzifə və hərbi xidmət haqqında” Azərbaycan Respublikası Qanununun 38.1.1-ci maddəsində nəzərdə tutulmuş xidmət müddətini keçmiş müddətli həqiqi hərbi xidmət hərbi qulluqçuları ehtiyata buraxılırlar.

Bu münasibətlə rayon və şəhərlərdə, eləcə də işğaldan azad edilmiş ərazilərdə yerləşən hərbi hissələrdə ordudan tərxis olunan hərbi qulluqçuların təntənəli yola salınma mərasimləri keçirilir.

Keçirilən tədbirlərdə ümummilli lider Heydər Əliyevin və ölkənin ərazi bütövlüyü uğrunda həlak olan şəhidlərin xatirəsi bir dəqiqəlik sükutla yad edilib, Azərbaycanın Dövlət Himni səsləndirilib. Vətən müharibəsində qazanılan parlaq qələbədən, Azərbaycan əsgər və zabitlərinin qəhrəmanlıq, şücaət göstərməklə şərəfli missiyanı yerinə yetirərək öz doğma torpaqlarımızı işğalçılardan azad etməsindən danışılıb.

Komandanlığın təbrik-müraciəti hərbi qulluqçulara çatdırılıb, hərbi xidməti uğurla başa vurmuş gənclərə uğurlar arzulanıb.

Ehtiyata buraxılan hərbi qulluqçular daima vətənin müdafiəsi naminə Ali Baş Komandanın əmrinə hazır olacaqlarını bildiriblər. Gənc əsgərlər isə silahdaşları adından, özündən əvvəlki döyüşçülərin ənənələrini davam etdirəcəklərinə, ərazi bütövlüyünü göz bəbəyi kimi qoruyacaqlarına söz veriblər.

Sonda xidmətdə fərqlənən bir qrup hərbi qulluqçuya Fəxri Fərman və qiymətli hədiyyələr təqdim olunub.

Poliqon.az

CATEGORIES